→ كل الوصفات
#كشري #اكلات_مصريه #ايمان_سليمان
المقادير
- 1/2 كوب أرز مصري
- 1/2 كوب عدس اسود
- ½ كيس معكرونه اسباجتي + معكرونه دوائر صغيرة
- ½ كوب حمص
- ¼ كوب شعيرية
- 2 بصله متوسطه متقطعه شرائح
- 8 فصوص ثوم مفروم
- كوب عصير طماطم فريش
- 2 معلقه كبيره معجون طماطم
- ¼ كوب خل ابيض
- ملح - فلفل اسود
- شطه
- عصير ليمون
- كمون
- كزبرة ناشفه
- مكعب مرقه دجاج
طريقة التحضير
- اول شئ هنحمر البصل في زيت و ده اللي هنستخدمه في كل حاجه في الكشري هنرش البصل بشويه دقيق و نقليه لحد ما ياخذ لون ذهبي حلو وبعدين نسلق المعكرونه ونقلبها في شويه من زيت البصل و نخليها على جنب و بعد كده هنسلق العدس نص سلقه يعني مجرد ما المياه تغلي نشيله عشان هيكمل سواه مع الأرز و نحتفظ بمياه سلق العدس وبعدين هنسلق الحمص في مياه و رشه صغيرة قوي كربونات الصوديوم و ده لو مستعجلين لكن لو نقتعه الحمص قبلها بيوم مش هتحتاجه تضيفوها و نسيب الحمص يتسلق
- نبدأ نعمل الكشري نفسه في حله على النار هنحط معلقتين من الزيت اللي اتحمر في البصل ونشوح الشعيرية تأخذ لون ذهبي نضيف الأرز بعدين ملح و رشه كمون ورشه كزبرة ناشفه ومكعب مرقه الدجاج وبعدين مياه سلق العدس ونضيف العدس و لو احتاج مياه تاني هنزود مياه مغليه مجرد المياه تغطي الكشري فقط و اول ما تغلي وتبدأ تتشرب هنغطي ونخفف النار على اقل حراره لمده ٢٥ دقيقه
- نبدأ نجهز للصلصه و الدقه في حله صغيرة على النار هنحط ملعقة كبيره زيت البصل و نشوح الثوم وبعدين نضيف معجون الطماطم و نقلب و بعدين نضيف عصير الطماطم وملح وفلفل اسود ورشه سكر ونسيبها تتسبك لمده ١٥ دقيقه تقريبا نبدأ بقي في الدقه في طاسه صغيرة مش على النار هنحط معلقتين كبار زيت البصل و عليهم ملعقة كبيره ثوم مفروم وربع كوب خل ابيض و عصير ليمون و ملح وفلفل اسود و كمون و شطه و ملعقة كبيره مياه و نحطهم على النار مجرد ما تغلي نشيلها من النار و كده بقت جاهزه معانا
- اخر حاجه بقي الشطه في طاسه صغيرة هنحط ملعقة كبيره زيت البصل و عليه ملعقة كبيره شطه و نقلبهم كويس مجرد ما يبدأو يغلو هنضيف ملعقة صلصة طماطم ونقلب لمده دقيقه وبعدين نضيف ربع كوب مياه و نتركها تغلي كام دقيقه كده ونطفي النار هتلاقوا الزيت فصل عن الشطه وكده كل حاجه بقت جاهزه في طبق بنضيف الارز على العدس ثم نضيف المعكرونه ثم نضيف الدقه و صلصله الطماطم و اخر شئ الحمص و البصل المقلي و بقي عندنا احلى وانضف طبق كشري في العالم وبالهنا و الشفا
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد