→ كل الوصفات

كشري مصري

من أشهر الاكلات الشعبية في مصر وكلنا بنحب طعمه ولا يخلو شارع في مصر من محل كشري واحنا ستات البيوت في صراع مع نفسنا أننا نعمل الكشري بأجمل طعم زي محلات الكشري...هو مكوناته ومقاديرة كتيره لكنه أسهل اكله ممكن تعملوها في البيت

  • للكشري
  • 2 كوب عدس بجبه
  • 2 كوب شعريه
  • 2 كوب ارز
  • كوب حمص منقوع
  • كيس مكرونه خواتم صغيرة
  • كيس مكرونه اسباجيتي
  • كيلو بصل مقطع جوانج
  • 2 كوب زيت لقلي البصل (لازم البصل يتحمر في زيت غزير)
  • للصلصه
  • كيلو طماطم معصورة
  • 2 او 3 معلقه صلصه
  • للدقه
  • كوب شاي خل و ليمون مخلوطين
  • 2 معلقه اكل توم مفروم
  • 2 او 3 كوب ماء (على حسب درجة تركيز الخل)
  • معلقه كبيرة كمون
  • 0.5 معلقه كبيرة ملح
  • معلقه كبيرة كزبرة جافه
  • للشطه
  • 3 معالق أكل كبيرة شطه حارة جدا ولو مش حارة نزود كمية الشطه
  • 2 معلقه زيت
  1. نقوم بنقع العدس في الماء لمدة ساعتين على الاقل
  2. نسلق الحمص ونبهره بالملح والكمون وفص توم
  3. بعد تقطيع البصل نرش عليه معلقه ملح ونقلبه فيه وبعد كده نقليه في الزيت حتى يصبح لونه ذهبي مائل قليلا للبني ونخرجه على ورق المطبخ....الملح هنا بيدي طعم حلو للبصل وبيخليه يقرمش ومايشربش زيت
  4. زيت قلي البصل مش هنرميه هنستخدمه في الكشري ومع المكرونه وفي الصلصه
  5. نبدأ بقا في الكشري نفسه هنضيف من زيت قلي البصل اللي يكفي لتسوية الشعرية والرز والعدس
  6. أولا نحمر الشعرية ونضيف عليها بعد كده الرز كأننا بنعمل رز بالشعريه عادي جدا ولما تتغلف حبات الرز بالزيت بنضيف العدس بعد ما نصفيه....نضيف من ماء سلق الحمص كوب ونكمل الباقي ماء مغلي عادي
  7. نضيف معلقه من البصل اللي حمرناه والتوابل عباره عن ملح وكمون وكزبره جافه ونسويه تسويه الرز المتعارف عليها
  8. نكسر المكرونه الاسباجيتي صغير ونسلق نوعين المكرونه مع بعض كما هو متعارف عليه وبعد السلق نصفيها ومانغسلهاش بالميه الباردة ونضيف عليها وهي سخنه ملعقتين او 3 من زيت قلي البصل ونقلبها كويس مع بعض (من غير نار)
  9. للصلصه....نقوم باخد آخر جزء متبقي من زيت قلي البصل ونسخنه على النار ولما يسخن نضيف 2 معلقه توم مفروم يتقلب تقلبيه سريعه ولازم ما ياخدش لون ثم نضيف الطماطم المعصورة والصلصه ونخففها قليلا بماء سلق الحمص ونضيف الملح والكمون والكزبرة الجافه ونص معلقة صغيره سكر ونتركها تتسبك (الصلصه لازم تكون مش خفيفه ومش سميكه يعني تكون وسط والملح يكون مش كتير لأن في ملح في الكشري وميه الحمص) نضيف كميه الماء اللي توصلنا لسمك الصلصه المطلوب
  10. للدقه..نضيف الخل والليمون والماء والتوم والملح والكمون والكزبره الجافه في حله صغيره على النار لغاية ما تغلى وبعد كده نشيلها ونسيبها تبرد ويفضل انها تتعمل من الصبح ونسيبها لغاية معاد الاكل
  11. للشطه..نضيف الشطه على الزيت على البارد وبعد كده نحطهم على النار الشطه هنا هتسخن شويه شويه مع الزيت ولما تسخن نضيف عليها من الصلصه معلقه ونزود الباقي ميه (الشطه بتكون كمان سمكها وسط مش خفيفه ومش سميكه ومجرد ما تغلي بنطفي عليها)
  12. ملحوظه مهمه....كل التوابل اللي بنستخدمها في الكشري هي الملح والكمون والكزبره الجافه فقط ولازم تاخد بالنا أن كل مكونات الا كله فيها ملح علشان كده لازم مانوصلش اي مكون منهم لدرجة الظبط في الملح يعني لازم يكون ناقص ملح شويه عن المعتاد ولما بنضيف كل مكونات الا كله مع بعضها هنلاقي ان ملحها مظبوط
  13. للتقديم..نغرف أولا الكشري (العدس بالرز والشعرية) وبعد كده نحط طبقه مكرونه حسب ما بتحبوا كميتها في ناس تحب مكرونه قليله وفي ناس تحب المكرونه كتير بعد كده نحط الحمص طبعا مش بيكون كتير واخيرا التقليه (البصل المحمر) وبنقدم الصلصه والدقه والشنط جانب الاكل وكل واحد ببضيف منهم حسب رغبته
  14. في الآخر انا بعتذر اذا كانت الوصفة طويله لكنها في التطبيق من أسهل الوصفات...وبالف هنا يارب
عجبتك الوصفة؟
شوف كل وصفاتنا في مكان واحد
كل الوصفات →