→ كل الوصفات
طعم رووعة وعالأصول 👌🏻🌺
المقادير
- 2 كأس رز مغسول ومنقوع لمدة نص ساعة
- كاس وربع عدس بني
- 400 غرام معكرونة سباغيتي
- 400 غرام معكرونة صغيرة (الشكل الى بتفضلوه)
- 4 بصلات اذا كانوا كبار و 6 اذا حجم البصل صغير
- زيت قلي
- رأس ثوم متوسط الحجم
- لصوص البندورة منحتاج
- 3 بندورة كبيرة
- قنينة عصير بندورة بيور (موجودة بالمول)
- معلقة صغيرة كمون مطحون
- رشة كزبرة
- معلقة صغيرة ملح
- شطة او حار حسب الرغبة
- معلقتين صلصة او رب بندورة (ممكن تحتاجي اكتر حسب الرغبة)
- و لتحضير الدُقة نحتاج
- 75 مل خل ابيض اي بمقدار ستيكانة شاي تقريبا
- كاس ماء
- 0.25 ملعقة كزبرة يابسة مطحونة
- رشة كمون
- ملح حسب الرغبة
- حمص للزينة
طريقة التحضير
- اول شي منقطع البصل حلقات او نص حلقة حسب الرغبة، ومنحط كمية زيت ذرة منيحة ومنقلي البصل فيهم لحتى يحمر ومنحطه على ورق مطبخ بمكان مهوى حتى ما يدبل (سر البصل المقرمش هو ينقلى بكمية زيت جيدة مو قليلة) ملاحظة: نستعمل الزيت الى قلينا فيه البصل في جميع الصلصات الى رح نحضرها
- الخطوة التانية منسلق العدس ب ٣ كاسات ماء لحتى يستوي ولما ينضج منحط عليه كاسة ماء باردة ومعلقة ملح كبيرة حتى يوقف استواه ومنحطه على جنب
- منبلش بصوص البندورة، منقشر البندورة ومنقطعها قطع كبيرة ومنفرمها بالهاند ميكسر او الخلاط، منقشر راس الثوم تقريبا تلات رباعه ومندقه منيح ، منقليه بزيت شوي لحتى يدبل مابيصير يصير الثوم غامق والا بيتغير الطعم، منضيف عليه قنينة عصير البندورة والبندورة الفريش ومعلقتين صلصة ومنحرك مع كاسة ونص ماء ومعلقة الكمون والملح ورشة الكزبرة والشطة ومنخليها تتسبك شوي على نار هادية ومنطفي
- لتحضير الدقة منستعمل باقي راس الثوم تقريبا 4 فصوص منقليهن شوي ومنحط عليهن الخل الابيض ومعها كاسة المي والملح والكزبرة والكمون ومنخليهن يغلو على النار شوي ونتركها على جنب. اذا بتحبوها احمض ممكن عصير ربع ليمونة معها
- بعد ما خلصنا الصوصات منسلق المعكرونة ومنحط بماء السلق زيت وملح وعادي منسلق النوعين سوا لحد ما تستوي ومنصفيها، قبل التقديم نضع شوي من زيت البصل ومنقلي فيه المعكرونة لحد ما تسخن
- منسخن العدس ومنحط عليه الرز (المغسول والمنقوع سابقا) وبعد مايغلي لدقيقتين ومنحطه على نار هادية بعدها لحد مايستوي ،ملاحظة: كتير ضروري ماتكون المي كتيرة لانه العدس بطبيعته رح يطلع ماء ورح يستوي الرز ممكن تضيفي شوي اذا لقيتي نشف كتير بالاخير وتسكري عليه
- منقلي الحمص بزيت تبع البصل شوي (بيعطي طعمة لذيذة للحمص)
- هلا وقت التقديم : منجيب جاط ومنوزع الرز بالعدس طبقات وطبقة معكرونة فوقها وهكذا ومنزينه بالحمص والبصل المقلي ويقدم بجانبه الصلصة والدقة، وصحة وهنا💕♥️
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد