→ كل الوصفات
#أجمل_طبق كفتة الفراخ طبق سريع وينفعك في كل وقت والكبار والصغار هيحبوه بإذن الله
المقادير
- 0.5 كيلو صدور دجاج مخلية
- بصلة واحدة كبيرة مفرومة
- بيضة
- كوب خضرة مفرومة (شبت+بقدونس+كزبرة)
- 5 فصوص ثوم مفروم
- 0.5 كوب بقسماط ناعم (فتات الخبز)
- ملعقة صغيرة ملح +ربع ملعقة صغيرة فلفل اسود
- ملعقة صغيرة بهارات دجاج
- "للصلصة البيضاء" :-
- كوب ونصف شوربة دجاج
- كوب ونصف لبن
- 3 ملاعق دقيق
- 3 ملاعق سمنة +زيت
- مكعب مرق دجاج (اختياري)
- ملح +فلفل
طريقة التحضير
- افرمى صدور الدجاج وحطيها في طبق و افرمى البصل والخضار مع بعض وبعدين اخلطيهم مع بعض وارجعى افرميهم ثاني كلهم لحد ماينعموا وضيفى كل المكونات مع بعض
- امسحى ايدك بزيت علشان تعرفي تكوريها بسهولة و ابدئي كوريها كرات بالحجم اللي تحبيه وانا هنا كورتها حجم اصغر شوية من المتوسط وطلعتلى 30 كرة كفتة
- وقبل ماهنحمرها في الزيت هندحرجها في الدقيق انا علشان البهدلة بجيب برطمان فوهته واسعة شوية زي برطمان النوتيللا وبحط فيه دقيق 3 معالق كبار وبحط كل كرة واهز البرطمان بحرص والفوهة الواسعة بتساعدنى انى امد ايدى واخرج الكرات خصوصا انها لينة شوية واى حاجة معدن ممكن تخرب شكلها
- وبالشكل ده دحرجنا كل الكرات استعدادا لتشويحها
- هنشوحها في ملعقة سمنة لحد ماتقريبا تأخذ لون من كل الاتجاهات وخليكى حريصة برده في تقليبها لانها لينة
- كده هي اخدت لون هنشيلها على جمب ومكانها هنحط الدقيق ونبدأ نعمل الصلصة البيضا اللي هي البشاميل
- هتشوحى الدقيق في السمن واول ماتشمى له ريحة وهتلاقى لونه بدأ يصفر هتنزلى باللبن ويكون معاكى مضرب يدوي هتنزلى باللبن بالراحة مش تحطيه كله مرة واحدة وتبقى ايد بتصب وايد بتضرب وزودى الشوربة كمان وممكن تزودى لبن او شوربة احنا عاوزين الصلصة خفيفة مش مظبوطة لانها هتتقل وكل ما الفراخ انتظرت شوية في الصلصة هتتقل بزيادة ولو عاوزة تحطى مكعب الدجاج علشان الطعم يبقى أغنى اتفضلى
- سيبيها تغلى لمدة دقيقتين وايدك معاها بتقلب علشان ماتلزقش وتشيط وتبوظ الأكلة وبعدين اسقطى الكفتة وسيبيها تغلى لمدة خمس دقائق على نار هادية
- انا اتبقى عندي ملعقة كزبرة خضرة ضيفتها على الصلصة بعد ما قفلت علشان الشكل والطعم وقدمتها بالهنا والشفا
- "ملحوظة":- انا حسيت انى لو ضيفت فص ثوم للصلصة دى هتبقى عالمية فبإذن الله المرة الجاية هضيفها للدقيق بعد ما يكون دخل في التحميص علشان مايتحرقش الثوم ويبوظ الطعم
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد