→ كل الوصفات
#مريولي_باسمي #باذنجان #صلصة_الطماطم #بقدونس #دجاج_مفروم اللهم صلّ وسلّم وبارك علـى سيّدنا محمد، حبيت نشـارك معاكــم اليـوم ضمــن تحدي مريول بإسمي كفتة بالدجاج المفروم والبادنجان 😋 طبــق بـزاف بنين وخفيف ينحي عليك حيرة 😋👌🏻😋، نتمنى تعجبكم الطريقة، أمسية طيبــــة أحبتـــي 💐💖💐.
المقادير
- 1 ملعقة كبيرة بصل مشحر
- حبة بادنجان مشوية ومقطعة
- 350 غ دجاج مفروم
- 1 ملعقة كبيرة شابلور
- 1 ملعقة كبيرة مزيج بين القصبر والمعدنوس مطحونين
- الملح حسب الذوق
- على راس الملعقة الصغيرة الفلفل الأسود
- ½ ملعقة صغيرة فلفل أحمر (بابريكا)
- ¼ ملعقة صغيرة كركم
- ¼ ملعقة صغيرة سكين جبير
- ¼ ملعقة صغيرة تابل الدجاج
- حبة بصلة متوسطة مرحية
- 3 فصوص ثوم مرابي
- 1 ملعقة كبيرة طماطم مصبرة
- كاس من صلصة الطماطم مجمدة محضرة من قبل
- الملح حسب الذوق
- رشة فلفل أسود
- ¼ ملعقة صغيرة كركم
- ¼ ملعقة صغيرة زعتر
- ورقة رند
- كاس إلا ربع ماء ساخن جدا
- 3 حبات بطاطا متوسطة مقطعة دوائر ومقلية
- رشة خفيفة من تابل الجبن
طريقة التحضير
- نبدأ على بركة الله،نشوي حبة البادنجان فوق الريشو ونحطها في كيس بلاستيكي ونغلفها مليح ونخليها حتى تولي دافية ونقيها (تجي ساهلة في التنقية)
- نقطعها إلى قطع صغيرة كما هو موضح في الصور ونخليها بجيه
- في هاذ الوقت نرحي حبة بصلة متوسطة في الآشوار، نفرغ القليل من الزيت في مقلاة ونخليه يسخن نضيف عليه البصلة ونخليها تذبال ثم نضيف الثوم مبشور، ونحي منها قيس ملعقة كبيرة ونخليها بجيه (نضيفها من بعد لخليط البادنجان)
- ثم نضيف الطماطم المصبرة نخلطها مليح ثم نضيف كاس من الطماطم المجمدة كنت حضرتها من قبل يمكن👈🏻 تفقد الطريقة من خلال هذا الرابط👇🏻 نخلط الكل جيدا
- ثم نضيف التوابل (الملح، الفلفل الأسود والكركم) خلطت الكل جيدا وفي الأخير ضفت الزعتر وورقة الرند خلطت الكل جيدا ثمّ مرّقت بالماء يكون سخون حوالي كاس إلا ربع وخليتها طيب على خاطرها وتعقاد على نار هادئة
- من جهة أخرى في صحن حطيت الدجاج مفروم مع ملعقة كبيرة من البصلة اللي نحيتها من قبل وحبة البادنجان ضفت التوابل (الملح حسب الذوق، الفلفل الأسود، الفلفلة حمرة، سكين جبير، الكركم وتابل الدجاج) مع ملعقة كبيرة خليط بين القصبر ومعدنوس مقطع رقيق وملعقة كبيرة شابلور (خبز يابس مطحون)، خلطت الكل جيدا حتى نساجمت كل المكونات
- شكّلت كريات صغيرة وضفتهم لصلصة الطماطم
- غلقت عليها وخليتها طيب على نار هادئة. في هاد الوقت قليت البطاطا على شكل دوائر
- ضفت للبطاطا المقلية رشة خفيفة من تابل الجبن (بلا ما نضيفو الملح تابل الجبن يجي مالح) وحطيتهم في صحن التقديم كما هو موضح في الصورة
- وفي الوسط حطيت كريات الكفتة والبادنجان وقدّمتو بألف صحة وهنا 😋👌🏻😋
- يجي بزاف بنين 😋 وشهية طيبة للجميع 🥰
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد