→ كل الوصفات
طريقة عمل كفته ارز بالبطاطس 😋 سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.
المقادير
- ¼ كيلو لحمه مفرومه
- كوب ارز مغسول و متصفي و مطحون
- بصله متوسطه الحجم
- بقدونس وكزبره وشبت متقطعين زي المحشي
- ملح وفلفل اسود
- رشه كزبره جافه
- كمون
- ¼ معلقه بيكنج باودر
- 2 حبه بطاطس متوسطه الحجم مقطعه مكعبات صغيره
- 2 كوب عصير طماطم فريش
- معلقه صلصه جاهزه
- فصين توم مفرومين
- زيت
طريقة التحضير
- اول حاجه هنعمل الكفته.. هنحط في الكبه البصل مقطع و اللحمه و الخضره و الرز المطحون والتوابل و نضرب كله ف الكبه لحد ما تنعم خالص و كل الخليط يتجانس
- هنسيب الخليط ده ف التلاجه ربع ساعه و نطلعه و نشكل بقا الكفته بس نبل ايدينا من وقت للتاني بشويه زيت علشان متلزقش.. و بعد ما شكلنا صوابع الكفته ندخلها التلاجه تاني من نص ساعه لساعه لو مش مستعجلين عليها خلوها اكتر كل ما بتقعد بتبقي احلي
- في حله بقا ع النار هنحط شويه زيت معلقتين كده و نحط فصين التوم المفرومين و نشوحهم لحد ماياخد لون اصفر ذهبي و بعدين رشه الكزبره الجافه و ننزل بمعلقه الصلصه الجاهزه و رشه سكر وتقلبتين و ننزل بعصير الطماطم الفريش و نسيبها بقا ع النار لحد ما تتسبك كويس ونضيف الملح ورشه فلفل اسود
- هنحط بقا مكعبات البطاطس ف الصلصه و نسيبها لحد ما تقرب تدخل ف السوا
- هنحمر صوابع الكفته في زيت سخن لحد ما تاخد لون جميل بس بلاش النار تكون عاليه اوي علشان تستوي من جوه كويس ف الزيت ونطلعها بعد ما تتحمر ع منديل مطبخ علشان تصفي اي زيوت زياده
- بعد ما البطاطس دخلت ف السوا هنضيف بقا الكفته و نقلب و لو احتاجت مياه هنزود مياه سخنه ونظبط الملح ورشه كمون و نسيب البطاطس مع الكفته لحد ما البطاطس تكمل سوا و الكفته تتشرب م الصلصه و تبقي طريه 😋
- تقدم مع ارز بشعريه و صحتين و هنا 😍⚘
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد