→ كل الوصفات
#عيد_الاضحى نركز مع بعض شوية بقالي يومين بنزل وصفات دايت ومن حقنا بقي نأخذ يوم فري 🤨 ،، طبق كلاوي الساعة ٢ بالليل حاجة كدة تجبلك حموضة عالماشي عشان تدعيلي 😘
المقادير
- 0.5 كيلو كلاوي
- قرن فلفل حامي (اختياري)
- مكعبات فلفل رومي
- مكعبات طماطم
- 8 فصوص ثوم كبيرة مفرومين
- ملعقة كبيرة خل
- ملعقة صغيرة ممسوحة ملح
- ملعقة صغيرة كمون
- 0.5 ملعقة صغيرة فلفل
- ليمونة
طريقة التحضير
- الاول اشطف الكلاوي بالماء وبعدين احط خل واشطفها تاني بسرعة ،،
- بعدين في الطاسة الغويطة احط ماء على الكلاوي واديها غلوة عشان تنزل الريم بتاعها والدم ينشف ومتقلقيش هتلاقي الكلاوي مطلعة ريحة وحشة عادي هي ريحتها كدة ،،
- بعدين ارمي الماء دي وارجع اشطفها تاني ، الطريقة دي مش هتخلي الكلاوي زفرة خااالص ،،
- في الطاية الغويطة بتاعتي بقي احط زيت وانزل بالكلاوي ابدأ اشوح فيها على نضافة بقي وبعدين انزل بالثوم واشوح ،،
- بعدين انزل بالفلفل واشوح ، بعدين الطماطم وكل التوابل واشوح لحد ما الفلفل يذبل والطماطم تنزل مايتها واسيبها لحد تمام السوي ،،
- اطفي عليها واعصر الليمونة ودوقي بقي احلى طبق كلاوي وبألف هنا 🙂
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد