→ كل الوصفات
الكمونية من الأكلات التراثية التقليدية فى السودان لكن بعد كدا انتشرت فى بلاد كتير ومنها طبعا مصر بالذات منطقة الصعيد، يمكن لقربها من السودان وتأثرها بعاداتها وتقاليدها. على الرغم من انتشار الكمونية فى بلاد كتير الا ان كل بلد بتعملها بطريقة مختلفة. يعنى الأساس هو الكمون والبصل فى كل البلاد لكن فى كمونية اللحم،اللسان،الكرشه،الكبد،الفراخ وفى كمان كمونية البطاطس. احنا هنعمل الكمونية على الطريقة المصرية، كمومنية اللحم وبما اننا داخلين على رمضان حابه اقدمها بطريقة مختلفة ، فهنخبز فخارة على شكل فانوس نقدم فيها العجين. فياللا بينا نبدء باسم الله
المقادير
- مكونات العجين
- 3 كوب دقيق
- 3 ملعقة كبيرة زيت
- رشة ملح
- بيضة
- كوب لبن دافىء
- ملعقة كبيرة سكر
- ملعقة كبيرة خميرة
- مكونات الكمونية
- ½ كيلو لحم يفضل نوع فيه نسبة دهون او ضانى ،انا بحب اقطعه صغير راس العصفور
- ملعقة زيت نباتى
- ملعقة زبدة او نستبدلهم بملعقة سمن
- مكعبات بصلتين كبار
- ملح وفلفل اسود حسب الرغبة
- ورق لورى
- ملعقة ونص كبيرة كمون مطحون ويفضل نطحنه وقت تجهيز الكمونية عشان ريحته هتكون احلى وأقوى
- بقدونس للتزيين
طريقة التحضير
- نضيف السكر والخميرة على اللبن الدافىء ونغطيهم دقايق على ما نخلط باقى المكونات نخلط الدقيق مع الملح،الزيت و البيضة نضيف خليط الخميرة للدقيق ونعجن كويس العجينة مش بتلصق فلو احتاجنا دقيق نزود واحدة واحدة ندهن بولة رشة زيت زيتون ونضع فيها كرة العجين بعد ما نغلفها هى كمان بزيت الزيتون ونتركها تخمر فى مكان دافىء من ساعه لساعتين حسب حرارة الجو
- نسخن خليط الزبدة والزيت نشوح قطع اللحم لحد ما تتكرمل وتكون طبقة خارجية جميلة نضيف البصل ونقلب نضيف الفلفل الأسود وورق الللورى نترك الكمونية على نار هادية جدا براحتها لحد ما تستوى اذا احتاجت مياه نضيف كمية قليلة من الماء المغلى بعد السوا نضيف الملح والكمون ونخلطهم ونطفى النار ونستمتع بريحة الكمون الطازة ممكن نرش رشة بقدونس أثناء التقديم مع أرز ابيض بالزبدة وطبق سلطة لكن احنا هنا هنقدمها داخل فخارة الفانوس المخبوزة
- العجين اكيد اختمر اختار بوله او حلة ينفع تدخل النار انا هنا اخترت فخارة وبوله مقاسها يركبوا على بعض ويشكلوا مجسم فانوس هندهن البولتين بالزيت نقسم العجين 4 اجزاء جزئين هنفردهم ونشكلهم على البولتين من الخارج وندهنهم بصفار بيض الجزئين الباقيين نلونهم بألوان طعام ونبدء نشكلهم اشكال نجوم وهلال عشان يناسب شهر رمضان طبعا تقدروا تعملوا الأشكال اللى تحبوها كمان حضرت شرائح من البصل ازين بيها لانه من المكونات الأساسية للكمونية نلصق البصل والأشكال اللى جهزناها ببياض البيضة اللى استخدمنا الصفار بتاعها
- ندخل الفرن على حرارة وسط حوالى 20 دقيقه او لحد ما يستوى البولتين بعد ما يخرجوا ويهدوا قليلا نفصلهم من الفخارات ونحطهم فوق بعض بحيث يقفلو على بعض نغرف جوا البوله اللى تحت الكمونية خبزت شكل هلال لوحده وثبته بخلة اعلى الفانوس فكرة جديدة ان شاء الله تعجب الولاد تقدروا تسرحوا بخيالكم فى التصميم والتزيين رمضان كريم ومطرح ما يسرى يمرى
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد