→ كل الوصفات

كيكة هشة وسهلة 😋

ومن اول مرة هتظبط معاكي عملت كيكات كتير بس كلهم مش ظابطين اوي 😓 ساعات مثلا مكتومة وساعات مش مستوية وساعات اتحرقت قبل السوا الكامل ولخبطات كتييير اوي..

  • 2 كوب دقيق فاخر او متعدد الاستعمالات
  • 1/2 كوب نشا "كورن فلاور"
  • 2 بيضة بدرجة حرارة المطبخ " لو ف التلاجة طلعيها قبلها بساعة
  • كوب لبن دافي
  • كوب الا ربع زيت
  • معلقه صغيرة فانيليا
  • معلقتين زبادي كبار
  • معلقة كبيرة خل ابيض
  • رشة ملح صغيرة
  • كوب وربع سكر ابيض
  • معلقة كيك شيف كبيرة
  1. ف الخلاط هنحط البيض والفانيليا ومعلقة الخل ونضرب مده دقيقة وبعدين نضيف السكر ونضرب دقيقة كمان وبعدين اللبن ونضرب شوية وبعدين الزيت ونضرب وبعدين معلقتين الزبادي ونضرب. ونجيب منخل وف بولة كبيرة نضيف الدقيق والنشا والملح والكيك شيف وننخل كويس علشان ندخل هوا ف الدقيق ونقلب المواد الجافه كويس ونضيف عليهم الخليط ونقلب كويس لحد منتاكد ان الدقيق اختفي
  2. وفي صنية مقاس ٢٨ مدهونة زيت ومتبطنة دقيق نضع الخليط وخبطتين صغننين ف الرخامة وع الفرن يكون ساخن قبلها ع درجة حرارة ١٨٠°وف الرف الثاني.وبالف هنا 😘
  3. شوية نصايح كده اتعلمتهم من ماما ومن الوصفات اللي قبل كده: الفرن يكون ساخن قبل وضع الكيك بمدة لاتزيد عن ٥ دقايق فقط. متبطنيش الصنية بدقيق كتير علشان بيبان ف الطعم. لو مش بتحبي الحاجه معسلة او فرد من افراد العائلة عنده السكر "شافاه الله وعافاه" كفاية كباية واحده هتكون ف المعقول للكل. انا مستخدمتش كوب معياري انا استخدمت كباية شاي عادية لكل المقادير. اللبن او الحليب يكون دافي مش ساخن علشان ميسويش البيض. بلاش تستخدمي بيكنج باودر تاج الملوك لانه بيغمق الكيك بلاش بيكنج خالص
  4. ومتفتحيش الفرن عليها ابدا قبل مرور ٣٠ دقيقة علشان متهبطش وبعد مرور الفترة دي تقدري تفتحي عليها وبخلة سنان تطعنيها من النص 😂كده ومن الحرف لو طلعت نضيفه مش عليها ولا فتفوتة كده استوت 🤤 ولو طلعت بفتافيت سيبها خمسة كمان ف الفرن. لو اتأكدي انها استوت خلاص اطفي الفرن وسيبيها ١٠ دقايق ف الفرن وطلعيها بعديها وسيبها تبرد ع الاخر وقطعيها ومشروب ساخن بقي او معلقة نوتيلا عليها او معلقة ايس كريم 😌.كفاية علشان جعت 😂
عجبتك الوصفة؟
شوف كل وصفاتنا في مكان واحد
كل الوصفات →