→ كل الوصفات

لازانيا

طريقة عمل لازانيا سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.

  • علبة لازانيا
  • 200 غرام لحمة مفرومة
  • بصلة مقطعة صغير
  • علبة ذرة
  • 0.5 علبة فطر
  • 4 حبات فليفلة مقطعة مربعات
  • حبة بندورة مقطعة مربعات
  • معلقة كبيرة و نص رب البندورة
  • صلصة البشاميل
  • 10 كبايات حليب
  • 8 ملاعق طحين
  • ملح + رشة قرفة
  • للوجه
  • جبنة موتزاريلا مبروشة او اي نوع جبنة بتفضلوها
  1. اولا نجهز الحشوة: نقلي البصل مع اللحمة المفرومة و منحط مع اللحمة بهار مشكل و جوزة الطيب و زنجبيل و القليل من الهيل
  2. ب جاط على جنب منخلط الخضرة مع بعض ما عدا البندورة و منضفلن رشة ملح و رشة اوريغانو و رشة حبق يابس و رشة بهار البيتزا اذا انوجدت و منزيدهم عاللحمة المفرومة و منقليهم مع بعض
  3. بعدين منضيف رب البندورة و البندورة(الطماطم) و منحركهم سوى و منعدل الملح بس تذبل الخضرة منطفي و منحطهم على جنب
  4. لتحضير البشاميل: منخلط مكونات البشاميل مع بعض على البارد و بعدين منحطهم على النار لحتى يطقل معنا المزيج شوي ما كتير(البشاميل بالعادة كل كباية حليب بدا ملعقة طحين بس هون قللت كمية الطحين لان ما بدي البشاميل يطقل كتير لسبب انو ما رح اسلق اللازانيا رح تستوي من خلال البشاميل)
  5. ب صينية منحط نتفة بشاميل عالأرضية و منحط طبقة من اللازانيا بعدين منحطلها شوي بشاميل و بعدها منوزع قسم من تتبيلة اللحمة و الخضرة منحط نتفة بشاميل و بعدين طبقة لازانيا و هيك لتخلص الكمية كلها من التتبيلة و البشاميل(اللازانيا مش شرط انو تخلص العلبة معنا حسب حجم الصينية و الكمية المستخدمة) و هيك بكون صار عنا طبقات
  6. منحط على وجهها الجبنة و مندخلنا الفرن (نضع الصينية على أرضية الفرن و منشعل من فوق فقط) و منتركها تستوي على مهلها
  7. و بالعافية
  8. ملاحظة: اللازانيا عبارة عن معكرونة بس عاملينها على شكل شرايح مستطيل و فينا نسلقها من خلال وضع ماء مغلية في صينية و نضع اللازانيا فيها.ما ضروري نتركها وقت طويل خلال دقيقتي بتطرا و فينا نستخدمها و اذا سلقناها من طقل البشاميل و منقدر نخفف كميته شوي
عجبتك الوصفة؟
شوف كل وصفاتنا في مكان واحد
كل الوصفات →