→ كل الوصفات
أمّي الغالية أبعث لكِ باقات حبي وإحترامي وعبارات نابعة من قلبي، وإن كان حبر قلمي لا يستطيع التعبير عن مشاعري نحوكِ، فمشاعري أكبر من أسطرها على الورق، ولكني لا أملك إلا أن أدعو الله عزوجل أن يبقيكِ ذخراً لنا، ولايحرمُنا ينابيع حبكِ وحنانكِ.أنتِ كلمة في كتاب أنتِ معناه ومحتواه، يا قمراً أنار دربي، يا نجمة تلمع في السماء، يا لؤلؤة البحر، يا ورداً نشر طيبه في الأفق فأغناه. أمّي الحبيبة إليكِ أهدية هذه الكلمات، يا من أنتِ أغلى من نفسي التي بين جوانحي، وأحبّ إليّ من روحي التي تسري في جسدي، يا من أجد عنده سعة الصدر ولين الجانب، تغمرينني بحنانك، فتزهرعني في حدائق قلبك، تحرسينني بعيونك، عيد ميلاد سعيييد امي ادعو الله ان يحفظكي لي ويفرح قلبك تلك الجميلة التي يساوي صباحها كل مافي العالم من جمال هي الأم. #حراير_الجزائر #اميرات_المطبخ #عيد_الام
المقادير
- 3 حبات بيض بحرارة المطبخ
- رشة ملح
- 90 غ سكر
- 1 ملعقة كبيرة فاني
- 90 غ فرينة
- ملعقة صغيرة خمارة
- 10 غ كاكاو بني
- خدمت زوج جينواز
- للقناش نستعمل
- 200 غ كريمة سائلة
- 100 غ شكولا سوداء
- 100 غ شكولا بالحليب
- للسيرو نحتاج
- 3 كيسان ماء
- كاس ونص سكر
- طرونش ليمون
- 1 ملعقة صغيرة عطر البراليني
- للكريمة نحتاج
- 2 كيسان بودرة الشونتيي
- 2 كيسان ماء بارد جدا
- للحشو
- حفنة من الجوز
- قطعة من الكيت كات
- 1/2 حبة موز مقطعة قطع صغيرة
- للتزيين
- تشكيلة من الشكولا حسب المتوفر
طريقة التحضير
- نحضر مكونات الجينواز ونبدأ باسم الله، أول حاجة وجدت القالب دهنت الأطراف بالسمن ورشيتهم بالفرينة وفي القاعدة حطيت ورق زبدة قطر المول 17 سم، نفصل بياض البيض عن الصفار ونحطو في إناء مع رشة ملح. نضرب أولا حتى يصبح الخليط رغوي ثم نبدأ نضيف السكر بالتدريج مع الخلط المستمر بالباتور (الضراب الكهربائي) حتى نتحصل على مورانغ
- ثم نضيف بالتدريج صفار البيض دائما مع الخلط المستمرحتى يندمج جيدا ويتضاعف الخليط نضيف الفاني. ثم في الأخير نضيف النواشف (الفرينة والكاكاو والخمارة) نغربلهـم وندخلهـم برفـق من تحت لفوق على 3 دفعات حتى ينسجم الخليط، نفرغو في القالب وندخلة للفرن المسخن مسبقا على درجة حرارة متوسطة مدة الطهي دات معايا تقريب نصف ساعة
- كي طيب الجينواز نقلبها على مشبك باش تبرد. بنفس المكونات وبنفس الطريقة خدمت زوج جينواز وحدة بالكاكاو البني ووحدة بالكاكاو الأسود. غلفتهم ببابي فيلم ودخلتهم للثلاجة مدة ليلة كاملة. للشاربات حطيت في كاسرونة الماء والسكر وطرونش ليمون فوق ودرتهم فوق النار مدة 10 د بعد الغليان وطفيت عليه ونكهتو بعطر البراليني وخليتو يبرد مليح. في كاسرونة حطيت الكريمة السائلة تسخن ورميت فيها الشكولا مزيج بين السوداء وبالحليب قطعتها قطع صغيرة باش ذوب بلخف
- خلطت مليح حتى ذابت نهائيا الشكولا وقسمت هاذ القناش على ثنين (الجزء الأكبر ضفتو للشونتيي والقليل خليتو للتزيين) ندخلها للثلاجة ونخليها تبرد. في هاذ الوقت نروح نطلع الشونتيي في إناء حطيت الماء بارد جدا والبودرة الشونتيي حتى أصبحت ثقيلة وكثيفة، ضفت القناش مع الخلط المستمر.حتى انسجمت المكونات وأصبحت كريمة متماسكة ولذيذة، نحطها في الثلاجة تبرد
- خرّجت الجينواز من الثلاجة قطّعت كل جينواز على ثنين بمساعدة الخيط، نحدد السمك بالسكين ونمرر الخيط ونجبد (نتمنى نكون وصّلت الفكرة)ملاحظة مهمة: يمكن نقطعو الجينواز إلى ثلاثة قطع لأن الجينواز تجي طالعة.نجيب المول الخاص بلاير كيك ونحط في الوسط قطعة من الجينواز نشربها مليح ونكون عمرت الكريمة في كيس حلواني باش تجيني ساهلة وندير طبقة من الكريمة من فوقها نحط قطع من الكيت كات وقطع صغيرة من الجوز. ملاحظة: من الأحسن كي نديرو المكسرات ما نوصلوهمش للجوانب (ماديروش كيما درت أنا) باش من بعد كي نكونو ليسيو ما يخ
- بنفس الطريقة ندير الطبقة الثانية هنا فوق الكريمة حطيت قطع صغيرة من الموز وهكذا حتى نكمل كل الطبقات مرة ندير الجينواز بالكاكاو البني ومرة الجينواز اللي بالكاكاو الأسود وبين الطبقات طبقة حطيت فيها الجوز والكيت كات وطبقة الموز وهكذا حتى نكمل الطبقات الأربعة. ملاحظة: هي أربع قطع جينواز وثلاثة طبقات من الكريمة الوسطانية درت فيها قطع الموز (للتوضيح فقط)
- الجينواز نشربها في كل مرة كي نكمل نحط الكريمة من فوق ونسرحها مليح نغطي القالب ببابي فيلم وندخلها للمجمد مدة ساعتين. ملاحظة مهمة: يمكن نخليها من 6 ساعات حتى ليلة كاملة تجي أحسن كي نكون من بعد نليسيها ونديكوريها أنا مكانش عندي الوقت خليتها غير 2 سوايع في المجمد
- كي فات هاذ الوقن ديموليتها بكل سهولة وحطيت صاير داير الكريمة بمساعدة السباتولا.ليسيتها مليح (لست محترفة) المهم حاولت نخلي الأطراف متساوية إلى حد ما، من فوق فرغت القناش اللي كنت خليتو من قبل ودرت بيه هاذ الديكور المعروف في اللاير كيك.أما الباقي من هاذ القناش (ما خداتليش بزاف من فوق) رجعتو للكريمة وعاود خفقتو حتى نساجمت المكونات ودرت بيه وريدات ونزينو حسب الرغبة وشية طيبة
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد