→ كل الوصفات
🌼(أستغفر الله الذي لا إله إلا هو وأتوب إليه) 🌼 #طبيخنا_المصري #وصفات_الشتاء من ضمن اكلات الشتا الرسمية عندما في مصر هو محشي الكرنب.. حاجة كدة عظمة والله من حلاوتة وطعامتة 😋👌 وخصوصا لو اتعمل بمرق البط وعلى طريقة حماتي ربنا يديها الصحة والعافية يارب.. جيبالكم الطريقة بالتفصيل عشان تقدرو تعملوة بمنتهي السهولة .. جربوة بطريقتها وادعولها دعوة حلوة وخلوا الدفا يملا البيت ❤️❤️
المقادير
- 1 كرنب حجم وسط
- 1/2 كيلو رز مصري يغسل عند الاستخدام وليس منقوع
- 1/2 كيلو عصير طماطم
- التسبيكة المميزة للمحشي 👇
- 3 بصل مفروم حجم وسط
- 1/3 كوب زيت
- 1 م ك سمنة
- 2 م ك صلصة (اختياري)
- 1 م ص من كل من
- كمون
- كسبرة
- ملح
- 1/2 م ص من
- سكر
- شطة
- فلفل اسمر
- 2 حزمة من: شبت.. البقدونس.. الكسبرة الخضرة
- إضافات بعد التسبيكة 👇
- 1 بصلة مفروم (أختياري) مش من الوصفة الأصلية بس بتدي طعم
- 1 م ص (ملح.. كسبرة ناشفة)
- 1/2 م ص (كمون.. فلفل اسمر)
- مرقة بط
طريقة التحضير
- بسم الله اللهم صل وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين ❤️
- نشيل الراس نسلق الكرنب في ماء مغلي على الجهة المفتوحة ونضيف لية شوية كمون وكل ما تستوي ورقة نشيلها ومش هتاخد وقت معانا
- نفرد الورق في طبق كبير أو مصفى كبيرة ونهوية
- نقطع العرق اللي في النص ونلف الورقة ونقطعها على حسب طول الصباع اللي حبينة وبعدين نفرد الورقة و نقطعة حسب الحجم اللي حبينة
- نعمل التسبيكة كالتالي 👈 في حلة نضع الزيت و البصل ونقلب البصل لحد ما يدبل وناخد بالنا مياخدتش لون يادوب يدبل ونضيف الصلصة ونقلب ودي أختياري بس بتدي نكهة حلوة اوي للتسبيكة ثم نضيف التوابل ونقلب شوية عشان تطلع نكهتها مع الحرارة ثم عصير الطماطم ونقلب ونخليها تتسبك كويس جدا وتطلع زيتها الوش ونسيبها تبرد تماما
- نضيف عليها الرز و والكسبرة والشبت والبقدونس ونقلب ونضيف حوالي ربع او تلت كوباية زيت ونضيف البصلة المفرومة ودي بردو أختياري عرفتها من شيف مش من الوصفة الأصلية وادت طعم تحفة 👌 ونضيف بقية البهارات ونظبط الملح والخطوة دي مهمة اننا منحطش البهارات كلها مع التسبيكة نحط شوية معاها وشوية بعد ما تتسبك دة بيدي نكهة أقوى للمحشي
- في قاع الصينية نضع ورق من الكرنب الأخضر لانة بيستحمل الحرارة اكتر ويساعدني ان المحشي ميتحرقش او يلزق في القاع نلف ورق الكرنب كالمعتاد ونرصة في الحلة ونخلي بالنا منكبسهوش او نضغط الصوابع جنب بعض واحنا بنرصة عشان الشوربة تتغلغل جواة ويستوي حلو
- نضيف شوربة البط الساخنة لحد قبل آخر صف في الحلة بمعنى لو شيلت الصباع اللي على الوش تكون تحتية الشوربة عشان يطلع مظبوط ومش معجن ونهز الحلة كويس ونتأكد ان الشوربة اتوزعت حلو جواها ونحاول نكون ظابطين الملح عشان يطلع مظبوط ونحط طبق قابل للتسخين يكبس(يضغط) على وش الحلة ودة بيحافظ ان الرز ميطلعش برة المحشي والصباع يحتفظ بشكلة 😉ونغطي بعد كدة الحلة ونخليها على نار عالية لحد ما يغلى ويبدأ يتشرب وبعدين نوطي النار زي مابنوطيها للرز كدة
- يقدم ساخن 🔥 مع البط المكمور او الروستو ويقدم بالف هنا يارب 😋 🍽️
- أخيرا اللهم أغفر لجدتي وارحمها واسكنها فسيح جناتك يارب ❤️
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد