→ كل الوصفات

محشي ورق عنب 🍇

#نكهة_بالذاكرة محشي ورق العنب من أروع والذ انواع المحشي طعم ورق العنب مع مزازة عصير الليمون حاجة كدة تحفة وبتفكرني بمحشي جدتي الله يرحمها يارب.. ممكن يتعمل مسبك زي ما معملتة او نص تسبيكة او ني في ني.. المسبك لا يعلى علية في جمالة وحلاوتة.. بعتزر لو الصورة مش اد كدة بس صورت بالعافية 😂 ملحوظة 🤓 المحشي بيبقى لونة فاتح اول ما يبرد لونة بيبقى اغمق شوية ولو اتحط في التلاجة بيبقى غامق خالص عشان العرايس والبنات اللي لسة اول مرة تعملة متتخضش بس 😂😂 حتى وانتي بتغرفية اللي بيبرد لونة بيغمق شوية فمتخافيش و تسلم ايديك ♥️👌

  • 1/2 كيلو ورق عنب طازة
  • 1/2 كيلو رز + نص كوباية تقريبا
  • 1 بصلة كبيرة مبشورة او مضروبة في الكبة
  • 1 طماطم كبيرة مضروبة في الكبة بدون ماء
  • 2 حزمة بقدونس
  • 2 حزمة كسبرة
  • 2 حزمة شبت
  • 2 م ك زيت دوار شمس او ذرة
  • عصير ليمونة او اتنين حسب الرغبة
  • شوربة دجاج او بط لو لحمة
  • مقادير التسبيكة 👇
  • 1/2 كيلو طماطم (مضروبين في الخلاط مع ربع كوب ماء)
  • 2 بصلة كبيرة مضروبين في الكبة
  • 1 م ص ثوم مفروم
  • 2 م ك صلصلة
  • 3 م ك سمنة + 3 م ك زيت
  • 1 م ص سكر
  • البهارات الخاصة بالمحشي 👇
  • 1 م ك نعناع جاف
  • 1.5 م ص كسبرة ناشفة
  • 1.5 م ص فلفل اسمر
  • 1 م ص كمون
  • 1 م ص السبع بهارات (أختياري) بس بتدي طعم تحفة
  • 1/2 م ص شطة (أختياري)
  • لسلق ورق العنب 👇
  • ماء مغلي
  • 2 م ك زيت
  • عصير ليمونة
  1. بسم الله اللهم صل وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين ❤️
  2. في حلة على النار بها ماء مغلي نضع الزيت وعصير الليمون وممكن رشة كمون ننزل برابطة ورق العنب ونغطسة في الماية دقيقة او لما لونة يغير نقلبة على الجهة التانية دقيقة بردو او اقل ونطلعة في طبق بة ماء بارد من الحنفية ثم نصفية وهكذا مع كل رابطة لحد ما نخلص النص كيلو..اهم حاجة ميزدتش مدة عن السلق عن من ٢ل٣ دقايق بالكتير والا هيتهري مننا
  3. نصفية في المصفي كويس ونبدأ نشيل العنقود بتاع الورق ونرصة ونجهزة للحشو.. نحتفظ بالعقود عشان هنحطة في الأرضية الحلة
  4. لعمل التسبيكة 👇 في حلة على النار نضع السمنة والزيت وعليهم البصل لحد ما يدبل.. نضيف الصلصة ونقلب ثم نضيف عصير الطماطم ونقلب كلة سوا ثم نضيف الثوم و السكر والملح ونظبط الملح بتاعها كأننا هنطبخ عادي ثم نضيف نص بهارات محشي والنص التاني هنضيفة مع الرز و الخضرة ونتركها تتسبك كويس جدا ويظهر السمنة والزيت عالوش. نتركها تبرد تماما قبل إضافة الرز والخضرة
  5. في طبق الحشو 👇 نضع الصلصة ثم نضيف الرز المغسول والمصفي و الخضرة و البصل المفروم وندعكة برشة ملح وفلفل و الطماطم و بقية البهارات ونقلب و نظبط الملح تاني ويكون مظبوط ثم معلقتين الزيت ونقلب
  6. نضع الورقة على الوش المناعم و يكون الوش الخشن او اللي فية عروق لأعلى بحيث نضع الرز علية و نقفل علية الأطراف و الجوانب و نشد عالورقة بحيث يكون الصباع متماسك معايا و شكلة حلو.. كمية الرز تكون متوسطة في الورقة مش كتيرة ومش قليلة و نخلص الكمية كلها ثم نرصها في حلة السوا
  7. في حلة المحشي 👇 في قاع الحلة كام ورقة من ورق العنب ثم العناقيد اللي شيلنها من الورقة و نضع شرايح بصل و طماطم ثم نبدأ برص المحشي ونراعي اننا منزنقوش في بعض.. (نخلي الحلة مهوية بالبلدي) 😂 ونخلي قفلة الورقة لتحت
  8. الشوربة توصل لحد الصباع القبل الاخير من الحلة بمعنى الشوربة تكون تحت رصة الصوابع اللي عالوش عشان يطلع مفلفل ومظبوط مش معجن
  9. التسوية 👇 لو كان المحشي معمول قبلها بليلة وبايت في التلاجة هنطلعة قبل السوا بساعة عشان الحلة تهدي من الحرارة ثم نرفعة عالنار ونضيف لية الشوربة لما تغلى ولازم تكون مغلية مش باردة.. نضيف عصير ليمونة او اتنين حسب الرغبة في المزازة و نهز الحلة عشان نوزع الشوربة والليمون ملحوظة 🤓 لازم يكون ملح خلطة المحشي مظبوط و ملح الشوربة عالي سنة بسيطة عشان المحشي يطلع مظبوط مش دلع
  10. ملحوظة كمان مش كل شوية تفتحي علية عشان ميسودتش او يبطش زي ما حصل معايا
  11. نضع طبق قابل للحرارة ميتكسرش فوق وش المحشي عشان ميفكش مني ويحتفظ بشكلة ولفتة ونغطي الحلة.. نخلية على نار 🔥 عالية لمدة تلت ساعة ثم نهدي النار لمدة ٤٠ دقيقة تقريبا و ملحوظة مهمة جدا 👌 سوا المحشي من ساعة ل ساعة ونص بمعنى بعد ساعة اكشفي علية وشوفي استوا ولا لسة لو استوى وبتحبية مفلفل اقفلي علية.. لو بتحبية طري وجوسي خلية كمان من ٢٠ ل ٣٠ دقيقة حسب الرغبة في السوا 😉
  12. ملحوظة 🤓 دوقي الشوربة بعد ما تغلى مع المحشي في أول ١٠ دقايق عشان تظبطي الملح ومتفتحيش علية كل شوية عشان يحتفظ بلونة. عناقيد الورق اللي حطناها بتدي مزازة لو بتحبيها حطية لو لا متحطهوش. النص تسبيكة بتبقى طماطم متسبكة لوحدها بدون بصل او توم و بعد ما البصلة تدبل وتتشوح في الحلة نضيف ليها الطماطم ونقلب وتاخد غلوة وتطفي مش بنستنى عليها تطلع سمنتها زي المسبكة. الني في ني خفيف و كلة المقادير بتتقلب على بعضها ونحشي وبس على كدة. المقادير اللي كتبتها بفضل الله مظبوطة جدا وغالبا مش هيفيض رز 😉👌
  13. جربوة مسمبك بطريقتي او زي ما بتحبو انا كتبت كل الطرق وكل واحد فيهم لية طعم بس أحلاهم المسبك 😋😋
  14. أخيرا دعوة حلوة لجدتي بالرحمة والمغفرة هي اللي عملتني لف الورق ورصتة من وانا طفلة.. ربنا يرحمها يارب ويغفر لها و يتجاوز عن سيئاتها ويجعلها من أهل الفردوس الأعلى من الجنة يارب العالمين 🤲 ❤️
عجبتك الوصفة؟
شوف كل وصفاتنا في مكان واحد
كل الوصفات →