→ كل الوصفات
طريقة عمل معكرونة بشاميل 😍 سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.
المقادير
- كيس معكرونة 400جرام
- ½ كيلو لحمة مفرومة
- 1 بصلة وسط أو كبيرة مبشورة
- 1 طماطم وسط متقطعه صغيرة
- 1 فلفلة خضراء متقطعه صغيرة
- قطع فلفلة الوان *حسب الرغبة*
- معلقة صغيرة ثوم مفروم
- ½ معلقة كبيرة ملح
- 1 معلقه صغيرة بهارات لحمة
- ½ معلقة صغيرة بابريكا
- 1 معلقه كبيرة صلصة
- ½ معلقة صغيرة فلفل اسود ونص ملعقة صغيرة كمون
- 2 كوب شوربة اي نوع فراخ او لحمة عادي
- 2 كوب لبن دافي أو درجة المطبخ مش بارد
- 3 معالق كبار سمنة
- 5 معالق كبار دقيق
- 1 معلقه صغيرة فلفل اسود
- 1 مكعب جبنة كيري
- جنبة موزاريلا وجبنة رومي
طريقة التحضير
- نسلق المعكرونة عادي جداً ونصفيها ونسبها على جنب وخلال سلق المعكرونة نعصج اللحمة كالتالي للي ميعرفش
- نشوح البصلة المبشورة بشوية زيت لحد ما لونها يصفر فنحط الثوم لما تطلع ريحته نحط الفلفل الاخضر والألوان وشوية ونحط اللحمة والطماطم وبهارات اللحمة والملح والفلفل والكمون والبابريكا ولو حابة تحطي زنجبيل حطي رشة بسيطة وتقلبي كويس وقبل ما تطفي عاللحمة حطي الصلصة وقلبي واطفي وعموما اللحمة المفرومة مش بتأخذ وقت ومتحاوليش تسيبيها تستوي على الاخر عشان متنشفش منك
- البشاميل بقى بنعمله على نار وسط عشان ميكلكعش منك كالتالي.نسخن السمنة ونحط الدقيق ونقلب كويس لحد ما الدقيق يمتزج بالسمنة ويسخن وبعدين نحط اللبن واحدة واحدة وتفضلي تقلبي عشان ميكلكعش وبعدين تحطي الشوربة برضه واحدة واحدة وانتي مستمرة في التقليب وتفضلي تقلبي لحد ما تحسي أن كل حاجة امتزجت والبشاميل تقل معاكي ولو حابة تخلي قوام البشاميل اخف بتزودي لبن لحد ما تعملي القوام الى انتي عايزاه وقبل ما تطفي عالبشاميل بتحطي الفلفل والجبنة
- المعكرونة لما بنسبها فترة بتلزق في بعضها فبتحتاجي تحطي فيها شوية ماء باردة أو تفكيها تحت الحنفية لما تفك معاكي تصفيها كويس وتحطي فيها معلقتين كبار بشاميل ومعلقه لحمة بالصوص والفلفلة بتاعها وقلبي كويس عشان المعكرونة تأخذ من طعم اللحمة والبشاميل
- بتختاري صينية مناسبة الحجم مش صغيرة ومش كبيرة وتدهينيها بشوية بشاميل من تحت وبعدين تقسمي المعكرونة نصين وترصي نص تحت وبعدين تحطي اللحمة المعصجة كلها كطبقة تانية ونص المعكرونة التاني تحطيها طبقه تانية واخر طبقه البشاميل وبعدين ترشي على الوجه جبنة رومي مبشورة ولو حابة تحطي موزاريلا حطي بتبقى حلوة وبتديها لون حلو مش محروق وطعم جميل
- بتحطيها فالرف الى في النص وبتاخد عشر أو ربع ساعة نار الفرن وعشر دقائق نار شواية
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد