→ كل الوصفات
طريقة عمل معكرونه بشاميل بالفراخ سهلة ولذيذة. اكتشفوا الوصفة الاصلية المضبوطة بالخطوات مع مكونات بسيطة وطريقة تحضير سهلة وسريعة.
المقادير
- ½ كيلو صدور مخليه
- مكعبات بصله
- فلفل الوان
- 1 طماطم
- معلقه سمنه
- ½ معلقه ملح
- فلفل اسود
- بابريكا
- ثوم بودرة
- بهارات فراخ
- كيس معكرونه 400 جرام
- 1 لتر لبن
- 3 معالق سمنه
- 3 ملاعق دقيق
- كوب شوربه
- ملح وفلفل اسود حسب الرغبة
- رشه جوزه الطيب
- 2 مكعب جبنة كيري
- جبنة موتزاريلا
- قشطه وجه اللبن
طريقة التحضير
- بالنسبه للفراخ: في طاسه ساخنه على النار هنحط سمنه ولما تسخن ننزل عليها بقطع الفراخ لحد ما تغير لونها و تنزل ميتها و تستوي والماء تنشف
- بعد كده هننزل عليها بالبصل يذبل شويه نحط عليهم الفلفل الألوان و الطماطم و نتبلهم بالملح و الفلفل الأسود و بهارات الفراخ و الثوم البودرة
- نقلبهم مع بعض كويس لحد ما الخضار و الفراخ يستوو مع بعض وفي الخطوه دي احنا ممكن ناكل الفراخ على كده عادي مع رز او نحشيها في فطير شرقي او كريب😋
- في الوقت اللي كنا بنعمل فيه الفراخ نكون بنسلق المعكرونه حله فيها ماء و شويه ملح لما تغلي نسقط المعكرونه ونغطيها لحد اما تستوي تقريبا ٨٥ ٪ بس بعد كده نطلعها على مصفاه
- تمام كده جهزنا الفراخ و المعكرونه نشغل الفرن على درجه ١٨٠ لحد ما نعمل البشاميل في حله على النار نحط ٣ ملاعق سمنه وننزل عليهم ٣ ملاعق مليانه دقيق ونقلب باستمرار كويس جداً لما يكون لونها ذهبي و الدقيق يستوي
- ننزل عليهم بكوب لبن الأول و نقلب كويس و بعد كده ننزل باقي اللبن و كوب شوربه الفراخ ونظبط الملح ورشه فلفل اسود و رشه جوزه الطيب لحد ما يوصل معايا قوام وسط مش تقيل
- نقفل عليهم خلاص نحط ٢ مكعب جبنة كيري و حوالي معلقتين بس جبنة موتزاريلا بيديهم طعم و قوام تحفه
- نكون مجهزين صينيه مقاس وسط مدهونه سمنه كويس نحط اول طبقه معكرونه مخلوطه بشويه بشاميل
- وعليها هنحط الفراخ بتاعتنا و يادوب كبشه من البشاميل بس ولو عايزين ممكن رشه موتزاريلا كمان
- و بس كده نحط باقي المعكرونه وعليها باقي البشاميل كله و نوزع عليه قشطه و جبنة موتزاريلا و ندخلها الفرن السخن الرف الوسط
- بتأخذ حوالي نص ساعة لحد ما المعكرونه تكمل سوى و الصينيه تأخذ وجه و لون حلو وانا مش بضيف بيض بصراحه وبالهنا و الشفا
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد