→ كل الوصفات
بصراحة وصفة اكثر من رائعة يخرجلكم مقروط يذوب في الفم ...اكثر مما تتصورو ...لازم تجربوها و راح تتأكدو من واش قلت 😋😘😘😘😘
المقادير
- 4 كيلات سميد متوسط
- كيلة إلا ربع زبدة ذايبة او سمن ذايب
- ¼ كيلة زيت
- ملعقة صغيرة سكر
- رشة ملح
- ملعقة كبيرة فرينة
- زيت للقلي
- عسل
- كمية تمر (غرس)
- ماء الزهر
طريقة التحضير
- في اناء نضع السميد والفرينة والسكر والملح نخلط النواشف مع بعض ونبدا بإضافة كيلة الزبدة الذايبة مع الزيت (الزبدة او السمن لما نذوبوهم نخلوهم يبردو قليلا منديروهمش وهما سخونين).. ونبدا نبسس في السميد و الزبدة ونحكوهم بين يدينا ناخذو وقتنا في التبساس حوالي ربع ساعة او اكثر حتى تنسجم المكونات مع بعض....نغطوها و نخلوها ترتاح
- ملاحظة : المدة لي نخلوه يرتاح فيها نتوما تحدوها تقدرو تخلوه ليلة كاملة او نصف يوم او تخدمو بسه مباشرة. انا خليتو رتاح حوالي ساعة وبديت نخدم بيه
- نجيب الغرس او التمر لي راح نخدمو بيه اذا كان جاهز نجيب كمية و نضيفلها مغرفة كبيرة زيت ونبدا نزيدلها في ماء الزهر ونعجنو فيها حتى نتحصلو على عجينة طرية نشكلها حرابيش ونخليها بجيهة. اما اذا شريتو التمر العادي غير الجاهز نقوه من النواة تاعو وديروه يفور لما يفور ضيفولو قليل من الزبدة مع قليل من ماء الزهر حتى نتحصلو على عجينة طرية
- نجيب الخليط بعدما رتاح و نجيب كيلة نصفها ماء و النصف الاخر ماء الزهر و نجيب اناء و نحط فيه قليل من الخليط و نبدا نرش في الماء+ماء الزهر عليه ونفتل فيه بصباعنا فقط متعجنوش بداو تزيدو ترشو حتى تتشكل في يدكم عجينة طرية..جيبو ساشي و حطوها في وسطو و عملوحربوش وفتحوه في الوسط و ديرو فيه التمر وغلقو عليه و شكلو حربوشطويل بواسطة الساشي باه يجوكم الحبات متساويين و قطعوهم حبات.. ولما تكملو كامل الكمية لي عندكم بداو طيبو فيه
- نحط الزيت فوق النار يسخن خلوه يسخن لدرجة كبيرة بعدها نقسو النار شوي و بداو ديرو في الحبات يطيبو و خلوهم حتى يحمرو مليح و نحوهم و مباشرة حطوهم في العسل ميكونش ثقيل بزاف و خلوهم في العسل حتى يطيبو الحبات لي يكونو فوق النار عاد نحوهم من العسل
- ان شاء الله يعجبكم و نتمنى انكم تجربوه لانو يخرج روعة روعة روعة شهية طيبة 😋😍😍😍😍😍
عجبتك الوصفة؟
شوف كل وصفاتنا في مكان واحد
كل الوصفات →
شوف كل وصفاتنا في مكان واحد