→ كل الوصفات

مقلوبة بالشاورما

أطيب مقلوبة ممكن تاكلوها انا ما بعملها غير بشاورما لحمة ولبحب فيه يقلي الباذنجان أو نحطه بالفرن حتى ما تتغمس بالزيت وتطلع دسمة كتير . حبيت اكتب الشرح بهالطريقة حتى تنفهم مزبوط ولان بدي اشرحها بتفصيل . #رمضان_كريم

  • 1/2 كيلو شاورما لحمة جاهزة او محضرة في المنزل
  • 2 كوب رز بسمتي أو أي نوع آخر
  • 2 حبة بصل مفروم
  • 4 حبات باذنجان متوسطة أو كبيرة
  • 4 حبة بندورة متوسطة
  • 1 فلفل احمر حلو
  • ملعقة صغيرة بهار حلو (سبع بهارات)
  • بهارات (فلفل أسود وأبيض ، بابريكا، قرفة، قرنفل)
  • ملح حسب الرغبة
  • زيت نباتي
  1. قشرت الباذنجان وقطعت ٢ بشكل دوائر و٢ بشكل مربعات متوسطة الحجم. قطعت حبتين بندورة والبصل مربعات صغيرة
  2. قليت الباذنجان الدوائر بقليل من الزيت لان ما بحب الزيت يتشرب فيه حطيتهم عجنب بصحن ، أضفت زيت لنفس الطنجرة وبلشت بتقلاية البصل تركتها لتتحمر زدت عليها الباذنجان المربعات
  3. لما ذبلو وتغير لونهم أضفت البندورة المقطعة وغطيت عليهم عنار خفيفة
  4. بهيدا الوقت اخدت حبتين بندورة وطحنتها مع قرن الفلفل الحلو احمر.(البندورة لازم تكون كتير مستوية) على فكرة هالصوص بيعطيها نكهة شهية ولون حلو
  5. بضيف صوص البندورة فوق تقلاية البصل والباذنجان ولبحب يزيد ملعقة شراب بيقدر كمان. بترك المزيج يغلي ٥ دقايق وبسكبه بجاط وبحطه عجنب
  6. بلش صف قطع الباذنجان عشكل دوائر بقعر الطنجرة وعجنبها وبسكب فوقهم قليل من خليط الصلصة لعملناها
  7. زدت فوقهم نصف كمية الشاورما وتركت الباقي عجنب
  8. صا وقت حط الرز اكيد بنقعه قبل بساعة وبغسله منيح. حطيتو بجاط وزدت عليه كمية الماء المطلوبة والبهارات والملح وخلطتهم منيح (لكل ٢ كوب رز نحتاج ٣ اكواب ماء)
  9. زدت نصف كمية الرز فوق الشاورما وبرجع بكرر طبقة صلصة طبقة شاورما طبقة رز لتخلص الكمية اكيد مع الماء. بغطي الطنجرة وبتركه ١٠ د على نار عالية ليغلي. وقت يغلي بخفف النار لمدة ساعة بكون الرز استوى على نار هادية
  10. بالنسبة للشاورما احيانا انا بشتريها خالصة من المطعم بس هالمرة جبتها وانا عملتها بالبيت. بفضل بلحم عجل كتير بتطلع طرية بالطبخ تبلتها وبهرتها قبل بيوم وتركتها عنار خفيفة حتى استوت منيح
  11. لما تصير جاهزة بطفي تحتها ما بقلبها فورا بنطر ٥ د وبقلبها بطبق واسع
  12. وبقدمها مع صوص الطرطور كتير طيب معها جربوها 😉. صحة وهنا
عجبتك الوصفة؟
شوف كل وصفاتنا في مكان واحد
كل الوصفات →